वीरगंज, १ जेठ (२०८३) । नेपाल बीमा प्राधिकरणको ५८औं वार्षिकोत्सवको सुखद अवसरमा सिद्धार्थ प्रिमियर इन्स्योरेन्सले आज वीरगंजमा एक भव्य प्रभातफेरी कार्यक्रमको आयोजना गरेको छ।
सिद्धार्थ प्रिमियर इन्स्योरेन्सका प्रदेश प्रमुख बद्री बहादुर अधिकारीको अध्यक्षतामा सम्पन्न उक्त कार्यक्रम आज बिहान वीरगंजका विभिन्न मुख्य सडकहरूमा परिक्रमा गरी सम्पन्न भएको हो। बीमा क्षेत्रको महत्व र पहुँचका बारेमा जनचेतना जगाउने उद्देश्यले आयोजित यस प्रभातफेरीमा विभिन्न सरकारी निकायका प्रतिनिधिहरू, वित्तीय संस्थाहरूका कर्मचारी, बीमा क्षेत्रका लब्धप्रतिष्ठित व्यवसायीहरू तथा स्थानीय सर्वसाधारणको उल्लेख्य र उत्साहजनक सहभागिता रहेको थियो।
कार्यक्रमका अध्यक्ष एवं प्रदेश प्रमुख बद्री बहादुर अधिकारीले बीमा क्षेत्रले ५८औं वर्ष पूरा गरेको यस ऐतिहासिक घडीमा सिद्धार्थ प्रिमियर इन्स्योरेन्सले आफ्नो व्यावसायिक प्रतिबद्धता र सामाजिक उत्तरदायित्वलाई उच्च प्राथमिकतामा राखेको बताउनुभयो। सहभागीहरूले बीमा सचेतनामूलक ब्यानर र प्लेकार्डहरू बोकेर सहरको मुख्य भाग परिक्रमा गरेका थिए।
यो वार्षिकोत्सवलाई सिद्धार्थ प्रिमियर इन्स्योरेन्सले बीमा क्षेत्रको विकास र नागरिकको आर्थिक सुरक्षाप्रतिको आफ्नो अटुट संकल्पको प्रतीकका रूपमा लिएको छ। प्रभातफेरीमा बीमा क्षेत्रका प्रमुख व्यक्तिहरूको समेत उपस्थिति रहेको थियो।
